有無諗過，去iSquare食餐飯只係需要$65？而且仲要係日式燒肉！
位於iSquare七樓既「燒肉牛藏」隸屬鴻星集團，出品有保障，估唔到既係，呢度既日式烤肉定食只係由$65起 (周末都有)，仲包埋前菜、飯同汽水，你都咪話唔抵！
餐廳裝修充滿日式風情，而且座位頗多，一大班朋友黎聚會都坐得舒服。
調味料方面，有胡椒粉、新鮮青檸同燒汁，另外仲有岩鹽，食靚燒肉，簡簡單單既調味已經足夠。
$65既選擇都有頗多，例如係醬汁豬肉、醬汁豬頸肉、醬汁雞肉、櫻花豚腩片等等，$68就有三式烤肉 (牛、豬、雞) ，而我地今日食「豪」少少，叫左「一口牛」同「牛肋骨」。
極上一口牛 ($89)
燒既時候有技巧：見到每邊煎熟先好反，唔好不斷反黎反去，用個箝feel下，如肉粒中間有實實地既感覺，就已經夠熟，如果仲係腍既，就要烤多一陣啦。
經過高人指點，我地都燒得唔錯，牛肉油脂分佈平均，牛肉味濃，中間仍然保持juicy，好味道。
醬汁牛肋骨 ($118)
呢個較有韓式風情，牛肋骨醃得入味，由於比較薄身，一煎即熟，腍腍既肉質，送飯很好。
芝麻雪糕、豆腐雪糕 (各$22)
慳左既錢，不如叫個甜品。剛剛食完咁多熱辣辣既烤肉，而家食個雪糕最啱數！呢度提供既都係日本雪糕，香濃既芝麻同豆腐味，相當出色！
