冬至喎，公司有得放早，我地呢D躝街精梗係無咁快返屋企，反而係去左太子既「居廬 Take a Break」hea一hea，嘆杯啡食個甜品。
響太子界限街，突然出現一間古色古香既茶室，就係佢啦。響呢度，幾乎每位客人都會帶埋平板電腦黎，邊飲咖啡邊上網，非常悠然自得！
薑餅人朱古力 ($42)
就先黎杯熱飲啦！臨近聖誕，要呃like就梗係叫薑餅人飲品 (其實餐單原本係薑餅人Latte，但我唔太飲咖啡，所以轉左Hot Chocolate)，面頭係一個好可愛既ginger bread公仔，相機食飽我再飲，好香朱古力味，但唔會太heavy，仲有胃食其他野！
番茄芝士薄餅 ($68)
食Pizza我鍾意食簡單既，呢個番茄芝士就啱晒我，原塊新鮮番茄+勁多芝士，面頭有少少黑椒調味，酸酸地帶微辣，餅邊香脆，開胃好食。
焗煙燻德國火腿牛角包配欖油雜菜沙律 ($68)
Pizza做得出色，我地即時encore個牛角包，果然同樣出眾！牛角包充滿牛油香，而且烤得鬆脆，一切即散；芝士同火腿永遠係絕配，鹹香惹味，夾埋酸酸甜甜既沙律醬，非常好。
紫薯草莓鬆餅 ($88)
花花造型，又係呃like之選！面頭係香芋雪糕，每一格窩夫都有半粒新鮮士多啤梨，我最怕食酸生果，呢D士多啤梨新鮮帶甜，啱食；鬆餅入面有紫薯蓉，淡淡既紫薯香甜味，邊皮烤得脆口，更添口感。
朱古力香蕉鬆餅 ($78)
鬆餅厚身，軟綿綿，放入口係滿滿既蛋香，當然唔好錯過濃濃既朱古力漿同新鮮香蕉，好夾，再飲多兩啖熱朱古力，咁就度過一個非常relaxing既下午啦！
