【葫同日式燒肉】令人回味無窮的「烤肉醬牛胸脊」

2017/02/24 at 11:19 

天氣開始涼,除左打邊爐,食日式烤肉都係好好既選擇。經朋友介紹,呢晚黎到上環既「葫同日式燒肉」食餐好。

餐廳唔大,但有足夠既空間感,室內燈光相當柔和,俾我好舒服既感覺。我地兩個人,點左一個$400既晚市套餐,全程有人燒埋,蹺埋雙手就食得。據老闆介紹,佢地幫客人燒埋,唔單止係要方便顧客,而且係想多D同客人傾計,增進溝通。

和風沙律

蔬菜新鮮翠綠,加上醋汁,酸咪咪夠開胃。

鹽蔥牛舌

牛舌係薄薄既一塊,上面鋪滿香蔥,店員只燒一面就足以令兩面都熟晒。蔥花好香,一啖放入口,大滿足!喜歡既話,可以點餐廳既特製醬汁,一邊係藥材豉油,另一邊係新鮮青檸汁,兩種味道都唔錯。

烤肉醬牛胸脊

頂級安格斯牛肉,油花分布平均,燒完成塊放入口,軟嫰有肉汁,非常美味,相信大家食完一轉都會好似我咁:追加一份!

椒鹽霜降松板豬

霜降松板豬,同樣有雪花,可惜店員燒得略乾,食落無我想像中咁肥美多汁,有少少失望。不過豬肉質素依然係唔錯既,有肉味,亦燒得香。

牛油去骨雞腿肉 + 一口雞翼

燒既時候,店員會將雞腿肉加上蒜蓉牛油,所以食呢個唔需要特別醮任何醬汁,都已經夠晒美味;雞翼已開半,食起黎好方便。無論雞腿肉定雞翼,都燒得雞皮微焦,非常脆口,雞肉嫰滑,唔錯。

翠肉瓜 + 椒鹽杏鮑菇

食左咁多肉,係時候食番D蔬菜。翠肉瓜沾上左味噌,增添左日本風味,兩種蔬菜燒完後仍保持水份,好食。

極級蟹膏帶子刺身 ($89)

食完套餐,唔係好夠喉,於是叫多一份餐廳既招牌菜蟹膏帶子。帶子相當厚肉,新鮮味美,更可貴係面頭既松葉蟹膏,聽老闆講,香港好少餐廳入到貨,所以真係要嗒真D!蟹膏味道甘香濃郁,細味有after taste,真係幾好,難怪可以成為signature dish!