「榮哥廚房私房菜」位於觀塘工廈裡面，同其他工廈食肆唔同，呢度無美輪美奐既裝修，甚至可以好老實咁講，呢度好似舊式茶樓，所有既裝修布置都老套兼殘舊，完全唔係我杯茶。
不過我一邊食，一邊感受到大廚既誠意，食物水準唔錯，一個私房菜套餐賣$328/位，究竟有咩食？
保健秋葵真味 + 涼伴黑木耳
有機沙律菜伴芝麻醬
單係前菜就有三款，都係好簡單既蔬菜，不過咁啱都係我喜歡既食物，木耳、秋葵、新鮮蔬菜，全部都非常有益且美味。
茶燻流心蛋伴黑魚子醬配厚切茄子
單睇相就知隻流心蛋好味，火候控制得啱啱好，蛋漿流晒落黎，蛋白有淡淡茶香；下面既茄子夠厚身，面層同底層都已炸香，食時記得點伴碟既酸甜醬，加入左芫茜碎，好香！
呢隻鮑魚做得超水準！爽口唔靭，成隻都充滿酒香，鮑魚味亦濃。出面餐廳做既鮑魚，多數用中式汁醬去炆或煮，呢種清酒煮法，我都係第一次試，非常好！
原盅燉哈密瓜螺頭黑毛豚肉湯
木瓜湯試得多，哈密瓜湯你又試過未？呢個湯由螺頭、龍眼、哈密瓜原盅燉成，甜到不得了，仲好味過阿媽煲，下次要帶佢黎食飯偷師先得！
蝦球水芙蓉
一片橙色原來係甘筍精華，香甜既味道！中間係蒸蛋白，好滑溜，本來想畢黎影相，但一畢即斷開，證明蛋白夠晒水嫰！
冰梅黑豚肉排骨
排骨肥瘦均稱，腍身唔乾，調味係話梅汁同子薑絲，酸酸甜甜好開胃，底部係米餅，脆卜卜一咬即碎，整體感覺良好！
鮮魚湯浸碧綠溫室菜苗
平時我唔鍾意飲魚湯，因為怕陣腥味，但呢個魚湯不但鮮甜唔腥，而且菜苗亦翠綠無渣，係好好既配搭！
荷香蒜蓉海斑片原籠蒸鴛鴦飯
香噴噴既蒜蓉同蔥花之下，係啖啖肉既新鮮斑塊，魚既鮮香油香，都流到下面既紅米同白米之間，將蒜蓉撈埋落去一齊食，實在係天下美味！
甜蜜美滿慶團圓 (甜點雙併)
雪糕無乜特別，呢度唔多講啦。個番薯波外層炸到脆卜卜，入面係甜甜既番薯，又脆又煙靭，令好怕熱氣既我都忍唔住食完再食！
