久唔久就會心思思想去食京林屋，鍾意呢度既裝修、食物，更重要係食完可以繼續行街。
好日式既裝修，好喜歡，每次入到黎都好想坐獨立雅座，可惜次次黎到都無緣。
桃味焙茶 (左，$42)；錦上之花煎茶 (跟餐)
桃茶味道清香，好香但唔會有甜味，鬈毛媽有糖尿都飲得；煎茶係清淡既綠茶，嗒落有餘韻，沖泡三杯後仍有茶香。
稻庭麵 (上，$68)；讚岐烏冬 ($68)
之前響度食過冷麵，感覺唔錯，今日天氣轉涼，就試熱湯麵啦！呢兩款麵都好滑，我尤其喜歡烏冬，滑中之滑，魚蛋有少少過腍，不過整體上，湯底同烏冬都非常好。
甘栗焙茶芭菲 (套餐連茶，$118)
秋季栗子最靚，所以餐廳都期間限定咁加入左呢款甘栗焙茶芭菲。除左平時食到既茶味雪糕、啫喱、紅豆、脆米之外，甜品內仲加入左一粒栗子同一層栗蓉，甜甜既味道，好幸福！
秘製抹茶蕨餅 ($88)
每次黎京林屋，總見到隔籬枱有人食呢款蕨餅，今次我地都叫黎試下。蕨餅本身好軟滑，帶有淡淡既抹茶同甜味，鬈毛媽食都唔覺太甜；我食既話，就加埋糖漿同綠茶粉，更香更甜，好味道！
