月尾啦！出糧啦！為左獎勵自己過去一個月既「有汗出，又有糧出」，梗係要食餐好！
小妹最鍾意食海鮮，呢晚去左銅鑼灣既「漁獲浜燒」食好野。日文既「浜」即我地既「濱」，意思係海邊，所謂「浜燒」，即是響海邊燒烤，係一種漁民料理：漁民將新鮮漁穫直接拎到海邊去燒，簡單咁加上鹽或者豉油去調味，咁就食到海產真正既鮮甜美味。
特製黑松露炙燒平目魚邊沙律 ($138)
既然餐廳標榜新鮮海鮮，今晚一於食盡佢，就連個沙律都唔好放過！平目魚，又即是我地講既左口魚，魚質嫰滑多油，加埋我最鍾意既牛油果，已經係絕配；沙律用醋汁調味，酸酸地夠開胃，而黑松露既味濃，就同味淡既平目魚同牛油果互補不足，係好好既配搭！
刺身盛合 (5款，$398)
五款刺身包括：牡丹蝦、日本海膽、油甘魚、赤龍魚、三文魚，魚鮮蝦甜，但印象最深刻既都係海膽，味濃，鮮甜，好得！食完好想再encore！
味噌蟹甲羅燒 ($78/隻)
響東京都有食過甲羅燒，果次味道比較鹹，酒味重，感覺一般；今次「漁獲浜燒」製法唔同，佢地將蟹膏、蟹肉、味噌醬、鵪鶉蛋、蔥花、炸麵包碎共冶一爐，食到蟹既鮮香，而且調味啱啱好，連個蟹殼都燒燶埋，令食物有少少焦香……個人覺得，比響東京食到既味道更佳。
燒喜之次 ($880)
喜之次一向係貴價魚，堪稱「魚中貴族」，身價咁高，自有其過人之處。喜之次產於北海道，當天氣開始凍，就會長出肥油，令全身充滿脂肪，食起黎特別香滑。而家食喜之次開始啱季節，呢條喜之次質素都唔錯，魚肉嫰，魚油足，魚味濃，未試過既朋友值得一試。
活帆立貝 ($128/隻)，活蠔 ($68/隻)，原隻鮑魚 ($176/隻)
之後就正式食浜燒啦。三種海鮮，都分別用清酒同牛油去燒，方便試到唔同味道。燒牛油帶子時火光熊熊，好精彩！但更精彩既係燒鮑魚，佢地實在太新鮮啦，一邊燒一邊跳舞 (記得睇片)，令人食指大動！
經歷左呢個世紀最長既十分鐘，海鮮終於燒好啦！隻蠔脹卜卜，一睇就知係靚野，清酒煮，突出蠔既鮮香；鮑魚爽口唔靭，啖啖鮮味，我加左少少柚子醬吊味，真係諗起都仲流緊口水！不過最最最正既，我覺得係帶子，厚肉鮮甜，清酒燒甜味突出，牛油蒜蓉燒鹹香惹味，我都係鍾意後者多D，可以一個人食十隻！
白桃酒 ($65)，八千代黑Shouchu ($58)，梨酒 ($65)
都介紹番今晚飲過既酒。我鍾意飲果酒，呢度有蘋果、桃、梨、柚子、梅等等選擇，我先黎一杯桃酒，好香桃汁味道，非常容易入口，啱晒女仔飲；因為實在太好味，最後忍唔住加多杯梨酒，呢個比較清，飲到尾有少少梨渣，真材實料，下次黎到一定要試埋其他味道！
番薯雪葩 ($58)，柚子雪葩 ($48)
最後黎個甜品作完美結束啦！柚子雪葩夠酸夠醒胃，好清新，用黎清喉嚨最啱；我就更愛番薯味道，淡淡既甜味，最正係食完雪葩可以食埋番薯肉，估唔到咁甜，一個甜品雙重享受，更加抵食！
