唔知點解識咁多天秤座朋友，每年到左十月左右就要不斷出去食生日飯，呢晚揀既餐廳係天后木星街既ROJO。
餐廳採用全落地玻璃設計，燈火通明，感覺好warm；時近萬聖節，餐廳都換上唔少應節裝飾，勁cute。
Rioja Vega ($58)
ROJO Sangria ($68)
Rioja Vega酒身醇厚，容易入口；Sangria用檸檬同橙＋Rum同Volka浸成，酒味較濃，女士們要有心理準備。
炭燒沙丁魚（$68)
心目中既沙丁魚都幾腥，但呢款就無呢個問題。餐廳只簡單用鹽同橄欖油調味，能夠食到沙丁魚既原味。
風乾火腿包（$68)
風乾火腿之下，係加入左蒜蓉既番茄蓉，簡單得黎幾惹味。
豬腩肉‧火箭菜‧熱包（$88)
五花腩肥瘦適中，炆得夠腍；外層係台灣刈包，中西合壁，估唔到又幾夾！食時可以加少少BBQ醬，係用墨西哥辣椒＋本地辣椒調製而成，都幾「啃」，大家落時唔好太重手。
雞肉辣味腸焗飯（Regular, $178)
西班牙海鮮飯食得多，呢晚搞搞新意思，試下雞肉辣味腸，意想不到，個雞肉幾有驚喜，竟然用煙燻方法製作，好香既smoke味，加埋鹹香既辣味腸同檸檬汁，重口味，啱我！
西班牙油炸鬼（$68)
Churros見得多，但從來無認真試過。呢晚真係一試愛上，好香肉桂味，炸到脆卜卜，唔加朱古力醬都已經好好味，大愛，之後再黎都會點多次！
