天氣開始涼，食火鍋係指定動作。尖沙咀山林道最近開左一間新餐廳叫「同人鍋」，行過見到餐牌價錢都幾抵，二百幾蚊就雞鍋同邊爐任食，閒日食仲唔會限時，啱晒成班老友開心吹水。
餐廳採用電磁爐，每張枱都有獨立抽氣系統，唔怕食到個身一陣味。
店員先送上雞鍋，可以自選辣度。我地先試微辣，真係好少既辣味；雞肉嫰滑，連雞胸都軟腍；我好鍾意墊底既薯粉，滑嘟嘟好入味，雪雪聲就食晒落肚！
食完一煲，心思思想「再來一個」，於是今次要小辣，辣味提升左，更加惹味，可恨個肚唔夠位，否則真係要再黎多幾煲！
除啤酒以外，飲品都係任添任飲，我揀左自家製雪梨茶，甜甜地夠清潤。
之後熱辣辣火鍋就黎啦，係番茄薯仔龍蝦湯底。呢度係唔offer椒絲、蔥花等配料的，因為餐廳想大家打完個海鮮邊爐後，可以好好細味鮮甜既海鮮湯底，而唔係一味食咁鹹、咁重口味。(我之後真係有飲番，的確幾鮮甜，因為海鮮料多嘛。)
海鮮火鍋料黎啦，估唔到場面都幾震撼！除左鮑魚、扇貝、刀貝之外，其他都可以任添，我最鍾意係個扇貝，勁厚肉，美味！
之後不得不介紹既，就係個安格斯牛肉 (呢碟同樣無得任食)，有肉味，軟腍無渣；仲想推介個墨丸，彈牙爽口，而且入面仲有新鮮墨魚肉，讚！
食咁多肉，最後當然唔少得齋菜啦，生菜爽口、粟米鮮甜，唔想食咁多肉，就叫多兩籃菜啦。
食晒成餐，真係飽到反艇。講真，呢個價錢真係幾抵食，雞煲同部分海鮮都有得任添，出面少有！
