【Praya Waterside Eatery】新海旁街靚餐廳

呢晚再次走到西環搵食,去到新海旁街既新餐廳Praya Waterside Eatery。餐廳採用全落地玻璃設計,加上柔和既燈光,令成間餐廳好warm好cozy。

餐廳座位闊落,大細枱都有,就算成班朋友一齊黎食飯都無問題。

Flat White/ Espresso Martini ($80)

Passion Fruit Mojito ($80)

餐廳設有大型bar枱,試問點可以唔飲番杯?Flat White/ Espresso Martini 味道有D似Baileys,但味道更濃烈,咖啡同酒味好夾好香醇,有after taste,喜歡飲咖啡既朋友唔好錯過;Passion Fruit Mojito用Rum酒調製,加上熱情果同青檸汁,味道清新,好啱女士飲。

香煎帶子配蜜餞豬腩肉 ($158)

採用北海道帶子,只用海鹽調味,煎到半熟,輕易咁帶出帶子既鮮味;豬腩肉有D似糖醋排骨,但更腍更甜,五花腩肉肥瘦適中,好食。

石榴烤煙鴨胸 ($148)

鴨胸以石榴醃製後烤香,有煙燻味道,口味偏濃,夾番底下甜甜既南瓜蓉食,味道剛好。

啤酒燉牛小排 ($288)

牛小排燉得非常軟腍,入口即溶;底下既酸椰菜絲同茄汁,剛好中和肉類帶黎既飽滯感,係幾開胃既一道主菜。

慢烤羊腿扒 ($258)

使用slow cook方法烹調,令羊肉質感更細滑,顏色仍保持粉嫰;底下有燉扁豆、煙肉、薯蓉等配料,非常飽肚,配番個微辣醬汁,惹味。

香炸香蕉配蜜糖乳酪和新鮮青檸 ($78)

有少少似高力香蕉,不過炸得更香脆,而且充滿肉桂香味,點埋旁邊既蜜糖乳酪,酸酸甜甜,感覺更清新。

朱古力蛋白酥配芒果及雲呢嗱忌廉 ($78)

響蛋白酥上面淋滿朱古力醬同忌廉,非常邪惡,加上旁邊既新鮮芒果粒、芒果乾同石榴粒粒,既酸且甜,食得人好滿足、好開心!