行街行到夜左，肚仔又打鼓，一於去山林道搵食。見到呢間「井橋日本料理」開到半夜兩點，唔駛食到趕頭趕命，就入黎試下啦。

餐廳地方唔大，只有10張枱左右，仲有一間細細既VIP房。最開心既係，夜晚十點後原來係宵夜時段，食物設有優惠價。

日本冷番茄 $38

番茄清爽，配以柚子汁，個汁酸酸地鹹鹹地，帶出番茄既鮮甜味。

三文魚刺身 $48；油甘魚刺身 $68

珍寶帆立刺身 $38；珍寶牡丹蝦刺身 $68

之後點左一系列既刺身，印象最深刻係帶子，勁厚肉，味道鮮甜；兩塊帶子中間夾左一塊檸檬，有提鮮既作用。油甘魚夠爽口，唔錯；牡丹蝦有蝦春，甘香味美。

燒味醂魚乾 $58

最鍾意食魚乾，但有時會食到D硬柴柴既好把鬼，呢度既就好食啦，魚乾較厚身，質感似軟既肉乾，味道豐富，點埋沙律醬食更一流。

明太子雞翼 $28；燒牛脷串 $28；燒雞皮串 $12

燒A4和牛串 $58

燒雞腎串 $18；燒煙肉蠔卷 $28；大蔥雞肉串 $15

串燒有特價，梗係瘋狂咁叫一轉。鍾意呢度既雞皮，好薄好脆，而且燒到好香，必點；明太子雞翼辣辣地，啖啖肉，食肉獸之選；A4和牛肥瘦適中，一咬落去，啖啖油香，唔怕肥既記得點；煙肉蠔出面比較少見，鹹香惹味。

日式燒飯糰 $10

想飽肚D，可以叫個燒飯糰。師傅好俾心機咁慢慢加醬油燒，先可以令到外層脆卜卜，入面仲保持軟綿綿熱辣辣。飯糰入面有木魚絲，鹹鹹地更好味。

日式紅豆年糕 $28

之後到甜品時間。年糕外層燒到微焦，脆卜卜，好有米香，上面淋滿甜絲絲既紅豆，一甜一清淡，味道啱啱好。

椰子雪糕 $58；北海道白葡萄酒雪葩 $58

推介椰子雪糕，用原個椰殼上，雪糕creamy又幼滑，椰子味非常香濃，必食；葡萄酒雪葩味道比較清新，感受唔到酒味，反而係食到香甜既提子味，相信小朋友都啱食。