【功德林】嘆住海景食齋菜

 

鬈毛媽胃炎左一排,飲啖水都會嘔,最近終於大病初癒,我想帶佢食餐好,但又唔敢食得太立雜,於是決定去食齋。

銅鑼灣既「功德林」位於世貿中心,坐擁無敵維港景,齋食風景都已經令人心曠神怡。

功德林三拼盤 $148

呢個拼盤可以自選三款冷盤,我地揀左上海烤夫、脆皮素鵝、無錫脆鱔。我最鍾意係素鵝,外皮好有蛋香,而且煎得香脆,入面包住冬菇同紅蘿蔔絲,甜甜地好味道;烤夫好入味,配埋冬菇、毛豆、雲耳,感覺好豐富;脆鱔又甜又脆口,好似食緊蜜糖合桃咁,小朋友一定鍾意。

素仁鬆配薄餅 $108

素仁鬆可以選擇配薄餅、叉子餅或生菜包,我地揀左薄餅,就好似北京填鴨果種,薄薄既一塊,上枱時仲跟埋乳豬醬。素仁鬆入面有紅蘿蔔、松子仁、西芹、冬菇等等,本身都幾夠味,唔駛加乳豬醬都已經very good。

竹笙百合北蟲草燉湯 $58

無加肉煲既湯,感覺清好多,竹笙、百合、蟲草本身亦唔係重味道既食物,所以令呢個湯更加清甜。

高力豆沙 (加香蕉) $78

鬈毛媽未黎之前已講明要食呢個,話之前食過好味 (一好番就好為食,哈哈),如佢所願叫一客,味道真係唔錯!蛋白做得鬆軟唔油膩,亦唔會過甜,夾番入面既紅豆餡同香蕉,甜度剛好,我竟然自己隊左三舊,罪過罪過!

紅棗椰汁糕

新鮮蒸出黎,送上枱時仲冒緊煙,質地又軟熟又煙韌,而且紅棗同椰汁味勁夾,唔會過甜,好好味,必食!



Leave a Reply

Your email address will not be published. Required fields are marked *


Social media & sharing icons powered by UltimatelySocial
Facebook
Instagram
YouTube
%d bloggers like this: