秋天到啦，趁住周末好天氣，一於入赤柱行下！風景好，心情好，肚仔自然餓！見到呢間Eat Bar竟然周末都有午餐，而且價錢相宜，無理由唔試下既。
餐廳環境唔錯，座位闊落，西式得黎又滲出淡淡港式風情，我buy！
Crab Meat Avocado Salad ($78)，同一款沙律，早兩日去石澳食要百幾蚊，呢度可以話係半價！咁當然，蟹肉既分量相對係少D，不過依然好味，因為蟹肉同牛油果都係我既至愛，加埋酸咪咪既醋汁，作為開胃菜實在一流！
然後我地點左兩個午餐，先黎餐湯同沙律。餐湯係忌廉磨菇湯，好creamy，奶味好重；沙律有青瓜絲、紅蘿蔔絲、洋葱絲，新鮮爽口。
好啦，我已經準備好啦，主菜快D黎啦，haha！
Tendoori Salmon ($78)，三文魚賣晒，轉左鱸魚，唔緊要，因為一樣好味。大廚功力夠，魚皮煎到脆卜卜，有魚油香；魚扒啖啖肉，完全無腥味，唔錯。
Grilled Tenderloin ($148)，我地點左medium，牛柳外層微焦，入面仍然保持嫰紅，牛肉鮮味，肉腍無渣，分量都好足，推薦！
Chocolate Cream (L) + Coffee (R)，前者朱古力味濃，幸福既甜味；後者就係普通咖啡，味道都唔差，咖啡迷可試。
