出港島區食飯又唔想同人逼，我有時會選擇大坑，呢度有好多心機小店，坐得舒服，又唔會俾餐廳限時，悠悠閒閒咁食餐飯，飲番杯傾下計，咁先係生活態度！
最近呢度開左間新店叫Warren，呢晚一於黎試下。
Warren店子細細，大概只有五六張枱，燈光柔和，感覺cozy。同朋友每人點左一個四道菜晚餐($380)，包左前菜、餐湯、主菜、甜品/飲品，以下一一介紹：
餐廳先送上餐包，麵包烤得微脆，配以黑松露牛油，好香既味道！
前菜：香煎法國鵝肝配芒果甜酸醬
鵝肝外層微焦，內裡保持嫰滑，配埋酸酸甜甜既芒果汁，可以減輕肥膩感。
餐湯：法式洋蔥湯
真材實料，面頭係芝士麵包，入面係勁多既洋蔥絲，洋蔥湯味道濃郁，同我響法國飲到既有得揮，值得推薦。
主菜：低溫油封三文魚柳配白酒汁
Slow cook 三文魚夠特別，同一般三文魚扒既死實感覺好唔同，有少少魚生feel，肉質鮮嫩。用白酒汁煮，味道唔會太濃，可以保持三文魚本身既味道。
主菜：海陸盛宴配蘑菇汁
即是大蝦配牛柳，大蝦爽口彈牙，鮮蝦味濃，屬新鮮貨色；牛柳肉質夠嫰，細細既一塊，唔會令人食得過飽。值得一提係配菜中竟然有白蘿蔔，通常中菜同日本菜先會用得上，估唔到白蘿蔔同西餐又幾夾。
甜品：自家製雪糕
雲呢拿雪糕，面頭淋左少量餅碎，增加口感，有畫龍點睛既作用。
餐飲：耶加雪夫咖啡
據店主介紹，咖啡豆來自耶加雪夫，呢度所生產既咖啡帶有一種獨特既柑橘香氣，果然不同凡響，咖啡迷必試。
意猶未盡，再點多兩杯Vina Errazuirz Merlot ($68)，呢款紅酒非常容易入囗，苦味唔多，放左一陣之後，更有少少果味，真係汪阿姐上身：「一杯飲完再一杯，好傾未嫌夜！」
