入左秋，個個朋友約食飯都話打邊爐，OKOK，一於試下唔同火鍋店既特色。呢晚我地黎到銅鑼灣既「米走雞Deluxe」，餐廳開左無耐，門口仲貼住「試業」字眼。
新式火鍋店格局，燈火通明，全部方枱，採用電磁爐，夠晒安全。
火焰麻辣雞煲 (小，$138)
呢度有兩款雞煲，一係「黃金芝士」，二係「火焰麻辣」，我麻麻地芝士，於是揀左後者。揀完鍋，仲可以選口味 (由清淡到特濃) 以及辣度。我揀既係「濃」同「小辣」。
燒紅個鍋，工作人員會過黎開蓋兼點火，只見火光熊熊，場面都幾震撼，炒炒炒一輪之後，侍應再加入麻辣汁，等多一陣就食得。
雞鍋味道濃郁，但對於我呢D重口味人黎講，覺得下次可以揀「特濃」；雞夠滑，但稍嫌大舊，女士食有少少唔方便。不過整體上雞鍋夠香辣惹味，水準唔錯。
金菇 ($28)，炸響鈴 ($48)
虎蝦 ($88)
手打五寶丸拼盤 ($88)
五寶丸包括墨魚丸、豬肉丸、蝦丸、牛丸、鯪魚丸。最鍾意係墨丸，爽口又彈牙；蝦丸既蝦粒都好大，真材實料。
黑松露蟹子魚麵 ($138)
細個食過魚麵，對呢種食品情有獨鍾，發展到今日，估唔到魚麵竟然已經加入黑松露同蟹子，高級好多！可能開口剪得大，呢個魚麵比較粗身，淥完出黎似一抽粉腸咁，好搞笑！魚麵有好香既松露味，蟹子脆卜卜，好味道。
手切特級霜降和牛 (小，$288)
和牛脂肪分布平均，肥瘦適中，雖然叫細碟，但分量都好足，抵食！
