【人間世茶會館】京都風慢活茶館

即係咁,我住又住觀塘,返工又返觀塘,都深明觀塘係一個人多車多塵多既地方,但唔好以為響呢區搵食就一定逼逼狹狹有氣無椗透,只要你識搵,一樣可以搵到世外桃源!

講緊既係位於觀塘工業區,駿業街既「人間世茶會館」,呢度係一間茶館,但都一樣有飯食。食飯價錢唔平 (食素約$138,食葷約$158),而且唔包飲品,但餐廳可以俾你一個好靜局既環境,舒舒服服咁嘆足一個下午,都算物有所值。(記住,12歲以下小童恕不招待。)

茶館地方頗大,有用餐既地方之餘,更有出售茶具既位置;裝修好有京都風格,枱面上更放置左綠色植物,優雅寧謐。
廣島蠔意大利飯 ($158)
廣島蠔脹卜卜,夠creamy,外層煎得香口;意大利飯奶味濃郁,軟硬適中,唔錯。
冬蔭公大蝦意粉 ($158)
一上枱已經聞到大蝦既獨有香氣,燒得好香,蝦肉鮮甜彈牙;意粉用泰式冬蔭公cross over西式忌廉汁,酸辣中帶奶香,水準之作。
台灣果茶 ($50)
餐廳有offer免費水,但既然黎到茶館,又點可以唔試下飲茶?點左呢款台灣果茶,用乾果沖泡而成,酸咪咪,好開胃,食完飯消滯最啱。