【Babbo Trattoria】親民意大利餐廳

去開銅記行街,食飯唔想同人迫既話,最好就係揀樓上舖。呢晚我揀左二千年廣場五樓既Babbo Trattoria,響正Times Square旁邊,非常方便。

餐廳座位闊落,採開放式廚房,設有bar corner,感覺開揚舒適。

意式薄片生牛肉 $148

食物方面,頭盤揀左生牛肉片。本來以為上枱會血淋淋,但原來牛肉有D似牛扒間既半生熟,平時唔食生肉既我,都完全接受到。牛肉軟腍無渣,有肉味,面頭灑上橄欖油、芝士同菜絲,本身有D清淡,唧少少檸檬汁吊味,very good,即刻鯨吞半碟!

Sangria (Red) $198

飲品點左Sangria (紅酒),甜甜既果味,容易入口。水果主要係檸檬皮,材料簡單,味道啱啱好。

香煎爐魚佐番茄慢燉蔬菜 $378

主菜方面,侍應推薦我地試下個鱸魚。果然無介紹錯,魚皮煎得乾身香脆,簡單以鹽同黑椒調味,令魚味更突出。魚肉結實無骨,啖啖肉無魚腥味,加埋旁邊既茄味蔬菜,感覺清新又健康。

雙味薄餅 (坎帕尼亞烤雞 + 卡拉布烏魚子) $238

餐廳提供既係拿坡里pizza,無厚薄批之分,一律都係呢個厚度,口感較煙靭。我地貪心揀左雙味,先食淡味既烤雞,除雞胸肉以外,仲有香菇、橄欖、芝士,材料豐富;另一邊既烏魚子,出面較少食到,烏魚子既味道有D似蟹膏,但魚味更濃,配番清淡既火箭菜同番茄仔,又係另一番好滋味。

Salted Caramel Puff Tart $58

甜品一上枱,即刻開心到「嘩」一聲,無諗過一個$58蚊既甜品會整到咁靚咁大堆頭,成幅畫咁。將Puff咬開,入面係海鹽焦糖餡,甜甜地好味道;Puff下面既奶油比較實淨,好重牛油味,之下就係蛋糕底+蛋撻皮;伴碟既係新鮮水果,配以士多啤梨jam,酸酸甜甜,令口腔再次refresh起黎!



Leave a Reply

Your email address will not be published. Required fields are marked *


Social media & sharing icons powered by UltimatelySocial
Facebook
Instagram
YouTube
%d bloggers like this: